ఎడారిలో సెలయేర్లు - మే 28
నీవు నన్ను ఆశీర్వదించితేనే గాని నిన్ను పోనియ్యననెను… అందుకాయన… అక్కడ అతని నాశీర్వదించెను (ఆది 32:26,29).
📖కుస్తీపట్లు వలన యాకోబుకి ఆశీర్వాదం, విజయం దొరకలేదు గాని, వదలకుండా పట్టుకుని వేలాడినందు వలన దొరికాయి.
👉 అతని తొడ ఎముక పట్టు తప్పింది. అతనింక పోరాడలేడు. కాని తన పట్టుమాత్రం వదలలేదు.
👉 పోరాడడానికి శక్తి లేకపోయినా తనతో పోరాడుతున్న ఆ వ్యక్తి మెడచుట్టూ చేతులువేసి వ్రేలాడబడ్డాడు. తనకి అతడు లొంగేదాకా వదలలేదు.
మనం కూడా పెనుగులాడడం మాని, మన ఇష్టాన్ని మరచి, మన చేతుల్ని తండ్రి మెడచుట్టూ వేసి అంటి పెట్టుకునే విశ్వాసంతో వేలాడితేనేగాని మన ప్రార్థనల్లో విజయం దొరకదు.
👉 సర్వశక్తిమంతుడైన దేవుని చేతుల్లోనుండి ఆశీర్వాదాలను గుంజుకోవడానికి మన బలం ఏపాటిది?
👉 బలవంతంగా దేవుని నుండి దీవెనలను లాక్కోగలమా?
మన ఇష్టానుసారమైన తీవ్ర ప్రార్థనలు దేవుణ్ణి కదిలించలేవు. ఆయన్ని అంటిపెట్టుకుని వేలాడే విశ్వాసమే విజయాలను సాధించే విశ్వాసం.
👉 మనం కోరుకున్న దాన్ని గురించి వత్తిడిచేసి ప్రార్థించడం వల్ల ప్రయోజనం లేదు. నమ్రతగా తగ్గింపు స్వభావంతో
“దేవా, నా ఇష్టం కాదు, నీ ఇష్టం” అన్నప్పుడే, మనలోని అహం లేక స్వలాభాపేక్ష చనిపోయినప్పుడే దేవుని సముఖంలో మన అభ్యర్థనకేమన్నా విలువ ఉంటుంది. కుస్తీపట్లు వల్లకాదు, పట్టుకుని వేలాడితేనే మనకి దీవెనలు దక్కుతాయి.
మనకి కావలసిన విషయం గురించి బంకలాగా పట్టుకుని అదే పనిగా దేవుణ్ణి అడగడం మంచిపని కాదని చెప్తూ ఒక భక్తుడు తన ప్రార్థన అనుభవాన్ని ఇలా చెప్పాడు, “మా అబ్బాయికి ఓసారి చాలా జబ్బు చేసింది. డాక్టర్లు పరీక్షచేసి పెదవి విరిచారు. నాలో ఉన్న ప్రార్థనా శక్తి అంతటినీ ఉపయోగించి వాడి గురించి ప్రార్థించాను. చాలా వారాలు ఇలా గడిచాయి. రోజురోజుకీ కుర్రవాడి స్థితి దిగజారుతూనే ఉంది.
“వాడు అలా మంచంమీద పడి ఉండగా ఒకరోజు అక్కడ నిలబడి వాడివంక తదేకంగా చూసాను. ఇలానే సాగితే ఇంకెంతో కాలం బ్రతకడు. వెంటనే మోకరించి దేవుడితో చెప్పాను. “దేవా నా కొడుకు కోసం ఎంతో సమయం ప్రార్థనలో గడిపాను, లాభం కనిపించడం లేదు. ఇక వాడిని నీ చిత్తానికి వదిలేసే సమయం వచ్చింది. ఇక నా ప్రార్థనల్లో ఇతరుల అవసరాలను నీ ముందు ఉంచడం మొదలు పెడతాను. ఈ పిల్లవాడిని తీసుకోవడం నీకిష్టమయితే అలానే చెయ్యి. నన్ను నేను పూర్తిగా నీ వశం చేసుకుంటున్నాను.”
“నా భార్యను పిలిచాను, నేను చేసిన పనిని ఆమెకి చెప్పాను. ఆమె కన్నీళ్ళు పెట్టుకుంది గాని పిల్లవాడిని దేవుని చేతులకి అప్పగించింది. రెండు రోజులు తరువాత ఒక దైవజనుడు మమ్మల్ని చూడడానికి వచ్చాడు. మా పిల్లవాడిని గురించి ఆయన చాలా శ్రద్ధతో ప్రార్థిస్తున్నాడు. ఆయనిలా అన్నాడు “మీ అబ్బాయి బ్రతుకుతాడన్న విశ్వాసాన్ని దేవుడు ఈ మధ్య నాకిచ్చాడు. మీకు విశ్వాసం ఉందా?”
“నేనన్నాను, ‘నేనైతే వాడిని దేవుడి చేతులకి అప్పగించేసాను. కాని మరోసారి వెళ్ళి ఆయనకి మొరపెడతాను’ అలానే చేశాను. ఆ ప్రార్థనలోనే నాలో విశ్వాసం చిగురేసింది మా అబ్బాయి బ్రతుకుతాడని, ఆ రోజునుండి వాడు బాగుపడసాగాడు. నేను పట్టువదలకుండా దేవుణ్ణి అడుగుతూ ఉండడంవల్లే దేవుడినుండి జవాబు రాలేదు. నేనలాగా మొండిగా ప్రార్థిస్తూ ఆయన చిత్తానికి నన్ను నేను లోబరచుకోకుండా ఉన్నట్టయితే మా అబ్బాయి ఈ రోజున బ్రతికి ఉండేవాడే లేదో అనుమానమే.”
దేవుని పిల్లలారా! మీ ప్రార్థనలకి జవాబు రావాలంటే మన తండ్రి అబ్రాహాముని అనుసరించి ప్రవర్తించాలి. ఎంత త్యాగానికైనా వెనుదీయనంతగా ఆయన ఇష్టానికి మనం లోబడగలగాలి (రోమా 4:12 చూడండి).