ఎడారిలో సెలయేర్లు - మే 16
📖దానియేలూ, భయపడకుము. నీవు తెలిసికొనవలెనని నీ మనస్సును అప్పగించి, దేవుని యెదుట నిన్ను తగ్గించుకొనిన ఆ మొదటి దినము మొదలుకొని నీవు చెప్పిన మాటలు వినబడినవి గనుక నీ మాటలనుబట్టి నేను వచ్చితిని. పారసీకుల రాజ్యాధిపతి ఇరువది యొక్క దినములు నన్ను ఎదిరించెను (దానియేలు 10:12,13).
ఇక్కడ ప్రార్థన గురించి మంచి పాఠం మనం నేర్చుకోవచ్చు. ప్రార్థనకు వచ్చే జవాబును నేరుగా సైతాను అడ్డగిస్తాడని స్పష్టంగా రాసి ఉంది.
దానియేలు ఇరవై ఒక్క రోజులు ఉపవాసముండి ప్రార్థన చేసాడు. ప్రార్థనలో చాలా శ్రమించాడు. అయితే ఇక్కడ రాయబడిన దాని ప్రకారం అతనికి వెంటనే జవాబు రాకపోవడానికి కారణం, దానియేలు యోగ్యుడు కాదని కాదు, అతని ప్రార్థన సరైనది కాదనీ కాదు. దేవుడు జవాబు ఇవ్వనందుకు కాదు గానీ, సైతాను అడ్డగించినందు వలన వెంటనే జవాబు రాలేదతనికి.
నిజానికి దానియేలు ప్రార్థించడం మొదలుపెట్టగానే అతనికి జవాబివ్వడానికి దేవుడు తన దూతను పంపించాడు. అయితే ఒక దుష్టశక్తి ఆ దూతని ఎదుర్కొని అడ్డగించి దూతతో పెనుగులాడింది. పరలోకంలోనే ఆ పెనుగులాట జరిగింది. అక్కడ పోరాటం జరుగుతున్న కాలమూ ఇక్కడ భూమి మీద దానియేలు ప్రార్ధనలో పోరాడుతూనే ఉన్నాడు.
“ఏలయనగా మనము పోరాడునది శరీరులతో కాదు గాని, ప్రధానులతోను, అధికారులతోను, ప్రస్తుత అంధకార సంబంధులగు లోకనాధులతోను, ఆకాశమండలమందున్న దురాత్మల సమూహములతోను పోరాడుచున్నాము.” పూర్తిగా మూడు వారాలపాటు దానియేలుకు జవాబు రాకుండా సైతాను అడ్డుపడగలిగాడు. దానియేలు దాదాపుగా ఆశ వదిలేసుకున్నాడు. దానియేలును పూర్తిగా అణగదొక్కేయాలని సైతాను అనుకుని ఉండవచ్చు. అయితే మనం భరించగలిగిన దానికంటే ఎక్కువ శోధన మన మీదికి రానివ్వడం దేవునికి ఇష్టం లేదు.
చాలామంది చేసే ప్రార్థనలు సైతాను చేత అడ్డగించబడుతూ ఉంటాయి. అయితే మీ విశ్వాసం, ప్రార్థనలు అలా పేరుకుపోతూ ఉంటే మీకే లాభం. ఉన్నట్టుండి ఒక్కసారిగా వరదలాగ ప్రవహించి జవాబుని లాక్కొస్తాయి. అంతేకాక అదనంగా కొన్ని ఆశీర్వాదాలు వాటితోపాటు కొట్టుకొస్తాయి.
అంధకార శక్తి పరిశుద్ధులకి తాను చేయగలిగిన హానినంతటినీ చేస్తుంది. అయితే ఎక్కువ వత్తిడులు, శోధనలు సహించిన ఆత్మే అతి విలువైనదిగా రూపుదిద్దుకొంటుంది. అలాటివారిని పరలోకం నిర్లక్ష్యం చెయ్యదు.