ఎడారిలో సెలయేర్లు - మే 2
📖యెహోవా ఆకాశమందు తన సింహాసనమును స్థిరపరచియున్నాడు. ఆయన అన్నిటి మీద రాజ్య పరిపాలన చేయుచున్నాడు (కీర్తన 103:19).
వసంత కాలం అప్పుడే ప్రవేశించింది. ఒక రోజున ఎక్కడికో వెళ్ళాలని బయలు దేరాను. హటాత్తుగా తూర్పు గాలి కొట్టింది. మహా వేగంతో నిర్దాక్షిణ్యంగా, భయం గొలుపుతూ, తనవెంట దుమ్మును రేపుకుంటూ బయలుదేరింది.
అప్పుడే ఇంటికి తాళం వేసాను. చిరాకుగా మనసులో అనుకున్నాను. “అబ్బ! ఈ గాలి…” ‘తగ్గిపోతే ఎంత బాగుణ్ణు’ అందామనుకుంటూ ఆగిపోయాను. ఆ వాక్యం పూర్తి చెయ్యలేదు.
నేను ప్రయాణమై వెళుతుండగా ఈ సంఘటన నాకో ఉపమానంలా అనిపించింది. ఒక దేవదూత నా ఎదుట నిలిచి ఒక తాళం చెవి యిచ్చి అన్నాడు.
“నా యజమాని నీకు తన ఆశీస్సులు చెప్పమన్నాడు. ఇది నీ కిమ్మని నన్ను పంపాడు.”
“ఏమిటిది?” “గాలి తాళం చెవి” ఆ దూత అదృశ్యమయ్యాడు.
చాలా సంతోషం వేసింది. త్వర త్వరగా ఎత్తయిన ప్రదేశాలకు, గాలి పుట్టే ప్రదేశాలకు వెళ్ళి ఆ కొండ గుహల మధ్య నిలబడ్డాను. ‘ఆ తూర్పు గాలిని మాత్రం ముందు అరికట్టాలి. అది ఇక నన్ను బాధపెట్టదు’ అనుకుని ఆ గాలిని పిలిచి దాన్ని నా తాళం చెవిలో బంధించాను. శూన్య ప్రదేశాల్లో ప్రతిధ్వనించే నిశ్శబ్దం వినిపించింది ఆ గాలి స్థంభించగానే. “ఇంతటితో తూర్పుగాలి పీడ వదిలింది” అనుకున్నాను.
“దాని స్థానంలో మరి దేన్ని తీసుకురావాలి?” అని ఆలోచించాను. దక్షిణ వాయువు చల్లగా ఆహ్లాదకరంగా ఉంటుంది. చిన్న చిన్న గొర్రె పిల్లలు, ప్రతి చోటా కళ్ళు తెరుస్తున్న పిల్ల జీవులు, రహదారుల ప్రక్కన కళ్ళు తెరుస్తున్న పూలమొగ్గలు సంతోషిస్తాయి. సందేహించకుండా దక్షిణ వాయువు తలుపులోకి తాళం పోనిచ్చాను. నా చెయ్యి మండడం మొదలు పెట్టింది.
“నేను చేస్తున్నదేమిటి!” బాధతో అరిచాను
“ఈ పనివల్ల ఎలాటి అరిష్టాలు సంభవిస్తాయో ఎవరికి తెలుసు! పొలాలకు ఏ గాలి కావాలో నాకేం తెలుసు! నేను చెయ్యబోయే తెలివితక్కువ పనివల్ల ఎన్ని నష్టాలున్నాయో కదా!”
ఎటూ తోచక సిగ్గుపడిపోయి దేవుడు మళ్ళీ తన దూతను పంపి ఈ తాళం చెవి నా నుండి తీసేసుకోవాలని ప్రార్ధించాను. ‘నేను మాత్రం ఆ తాళం చెవిని ఇక ఎప్పుడూ కావాలని కోరుకోను’ అని నిశ్చయించుకున్నాను.
చూస్తుండగానే దేవుడే నా ఎదుట ప్రత్యక్షమయ్యాడు. తన చెయ్యి చాపి తాళం చెవిని తీసేసుకున్నాడు. ఆయన చేతిలో దాన్ని ఉంచుతూ చూసాను - అది ఆయన చేతిలోని గాయపు మచ్చమీద ఆనింది. ఆయన చేసిన కార్యాలలో దేనిమీదనైనా విసుక్కున్నందుకు బాధపడ్డాను. అలాటి ప్రతి పనిలోనూ నాపట్ల ఆయనకి ఉన్న ప్రేమ ముద్రితమై ఉంది. ఆయన ఆ తాళం చెవిని తన నడుముకి కట్టుకున్నాడు.
“ప్రభూ, అయితే ఈ తాళం చెవి నీ చేతిలో ఉంటుందా ఎప్పుడూనూ?” ప్రభువుని అడిగాను. “అవునయ్యా” దయతో జవాబిచ్చాడాయన.
👉 నేను తేరిపార చూస్తే, నా జీవితానికి సంబంధించిన తాళం చెవులన్నీ ఆయన నడుముకే వేలాడుతున్నాయి. నా మొహంలోని ఆశ్చర్యాన్ని చూసి ఆయన అన్నాడు “కుమారా, అన్నీ నా అదుపులో ఉన్నాయని నీకు తెలియదా?”
“అన్నీనా ప్రభూ?” భయభక్తులతో పలికాను, “అయితే దేన్ని గురించి కూడా విసుక్కోవడం నాకు క్షేమం కాదు. నీవే అన్నింటినీ నిర్ణయిస్తున్నావు కదా.”
ఆయన ప్రేమతో నా మీద తన చెయ్యి వేసాడు. “కుమారా, ప్రతి దానిలోనూ నీకు క్షేమకరమైనదేమిటంటే, నన్ను ప్రేమించడం, స్తుతించడం, నాపై నమ్మకముంచడం.”