ఎడారిలో సెలయేర్లు - జూన్ 14
నీ నమ్మిక తప్పిపోకుండునట్లు నేను నీకొరకు వేడుకొంటిని (లూకా 22:32).
క్రైస్తవుడా, నీ విశ్వాసాన్ని గురించి జాగ్రత్తపడు. ఆశీర్వాదాలను పొందడానికి ఏకైక మార్గం విశ్వాసమే అని గుర్తుంచుకో. కేవలం ప్రార్థనవల్ల దేవునినుండి జవాబులు రాబట్టలేం. ఆ ప్రార్థన విశ్వాసంతో చేసిన ప్రార్థనై ఉండాలి.
👉 పరలోకాన్నీ భూమినీ కలిపే టెలిఫోన్ లైన్ విశ్వాసమే. దేవుని ప్రేమ సందేశాలు ఆ లైన్ ద్వారా ఎంత వేగంగా పరుగెడతాయంటే అసలు మనం పిలువకముందే ఆయన మనకు సమాధానం ఇస్తాడు. మనం మాట్లాడడం ముగించక మునుపే ఆయన అర్థం చేసుకుంటాడు. కాని విశ్వాసమనే టెలిఫోన్ లైన్ తెగిపోయినప్పుడు ఆ వాగ్దానాన్ని మనమెట్లా పొందగలం?
👉 నాకు కష్టాలొచ్చాయా?
- 🔹 నాకు సహాయం విశ్వాసం ద్వారానే దొరుకుతుంది.
👉 శత్రువు నన్ను లొంగదీస్తున్నాడా?
- 🔹 విశ్వాసం ద్వారానే నా ఆత్మ తన ఆశ్రయదుర్గాన్ని చేరుకుంటుంది.
అయితే విశ్వాసాన్ని ప్రక్కన పెట్టి దేవుణ్ణి గొంతు చించుకుని పిలిచి చూడండి, పలకడు. నా ఆత్మకీ పరలోకానికీ మధ్య విశ్వాసం తప్ప మరి యే దారి లేదు. ఆ రోడ్డు మూతబడితే పరలోకపు రాజుకి విన్నపాలు పంపుకునేదెలా?
విశ్వాసమనేది, దైవత్వంతో నాకు సంబంధమేర్పరుస్తుంది. యెహోవా శక్తిని నాకు ధరింపజేస్తుంది. నేను శత్రువు నెదుర్కోవడంలో దేవునిదైన ప్రతి ఆయుధమూ నాకు సహాయపడేలా చేస్తుంది విశ్వాసం.
అంధకారశక్తుల్ని అధిగమించడానికది సహాయపడుతుంది. నా శత్రువుల శిరస్సుల మీదుగా విజయోత్సాహంతో నడిచిపోయేలా చేస్తుంది. అయితే విశ్వాసం లేకుండా దేవునినుండి ఏమి పొందగలం?
కాబట్టి క్రైస్తవుడా, నీ విశ్వాసాన్ని కాపాడుకో, నువ్వు నమ్మిక ఉంచగలిగితే చాలు. నమ్మేవాళ్ళకి అన్నీ సాధ్యమే.
మనం విశ్వాసంలాటి మానసికమైన దానికంటే, మరేదో తాకిచూసి తెలుసుకో గలిగింది కావాలంటాము. కాని పౌలు ఏమంటున్నాడో చూడండి. వాగ్దానం దృఢమైనది కావడం కోసం అది విశ్వాసమూలమైనది అయ్యింది (రోమా 4:16).
విశ్వాసం దేవుణ్ణి ఘనపరుస్తుంది. దేవుడు విశ్వాసాన్ని గౌరవిస్తాడు.