ఎడారిలో సెలయేర్లు - జనవరి 5
📖సహాయము చేయుటకు నీకన్న ఎవరును లేరు (2 దిన 14:11)
దేవునిదే పూర్తి బాధ్యత అని ఆయనకు గుర్తు చెయ్యండి.
👉 నువ్వు తప్ప సహాయం చేసేవాళ్ళు మరెవరూ లేరు. వెయ్యి వేలమంది ఆయుధాలు ధరించిన సైనికులు, మూడువందల రథాలు అతనికి (ఆసాకు) ఎదురై నిలిచాయి. అంత గొప్ప సమూహం ఎదుట తనకై తాను నిలవడం అసాధ్యం. అతనికి సహాయంగా ఇతర సైన్యాలేవి రాలేదు. అందువల్ల అతనికున్న ఒకే ఒక నిరీక్షణ దేవుడే.
నీ జీవితంలో కష్టాలన్నీ ఒక్కపెట్టున కలిసికట్టుగా వచ్చిపడితే, చిన్న చిన్న ఇబ్బందుల్ని తొలగించుకోవడానికి ఇతరుల సహాయం తీసుకున్నట్టు ఇప్పుడు కుదరదు. సర్వశక్తిమంతుడైన ఆ పరమ స్నేహితుడే మనకి ఆ సమయంలో దిక్కు.
నీకూ, నీ శత్రువుకూ మధ్య దేవుణ్ణి పెట్టు. ఆసా విశ్వాసం ఎలాంటిదంటే జెరహుకూ (కూషు దేశపు రాజు), తనకూ మధ్యలో దేవుడు నిలబడినట్టుగా అతనికి అనిపించింది. ఇది యదార్ధమే. కూషీయులు “యెహోవా భయముచేతను, ఆయన సైన్యపు భయముచేతను పారిపోయారు” అని రాసి ఉంది. ఇశ్రాయేలువారి పక్షంగా పరలోకపు సైన్యాలు వాళ్ళ శత్రువుల మీద విరుచుకుపడి అంత గొప్ప సైన్యాన్ని ఊచకోత కోసారేమో అన్నట్టుగా ఉంది.
ఇశ్రాయేలీయులు కేవలం వాళ్ళని తరిమి దోచుకోవడం మాత్రమే చేశారు. మాన దేవుడు సైన్యములకధిపతి అయిన యెహోవా. ఊహించలేని రీతిగా ఏ సమయంలోనైనా తన ప్రజలను ఆదుకోవడానికి వస్తాడు.
నీకు, నీకు వచ్చిన కష్టానికి మధ్యను ఆయన ఉన్నాడని నమ్ము. నిన్ను కంగారుపెట్టే ఆ కష్టం గాలికి మేఘాలు కదిలిపోయినట్టు ఆయన ఎదుట నుండి పారిపోతుంది.
దేనికైనా ఆనుకునే ఆధారం కరువైతే కోటలు బద్దలై కూలిపోతే దేవుడున్నాడన్న ఆలంబన తప్ప మిగిలినదంతా అయోమైపోతే,
నమ్మకం నిలబడే తరుణమిదే వీక్షించే బాటకన్న విశ్వాసపుచూపు మిన్న కనుపించని పెనుచీకటిలో నమ్మకమే విశ్వాసపు వేకువ వెలుగు
అబ్రహాము దేవుణ్ణి నమ్మాడు. కంటికి కనిపించేదానిని ప్రక్కకు నెట్టాడు. ప్రకృతి ధర్మాలను ‘మీరు గొడవ చెయ్యకండి’ అంటూ ఆదేశించాడు. అనుమానాల హృదయాన్ని “నోర్మూయి, శోధన పిశాచి” అని గద్దించాడు. అబ్రహాము దేవుని నమ్మాడు.