ఎడారిలో సెలయేర్లు - జనవరి 1
📖మీరు నది దాటి స్వాధీన పరచుకొనుటకు వెళ్లుచున్న దేశము కొండలు లోయలు గల దేశము. అది ఆకాశ వర్షజలము త్రాగును. అది నీ దేవుడైన యెహోవా లక్ష్యపెట్టు దేశము. నీ దేవుడైన యెహోవా కన్నులు సంవత్సరాది మొదలుకొని సంవత్సరాంతము వరకు ఎల్లప్పుడు దానిమీద ఉండును. (ద్వితీ 11 :11-12)
ప్రియమైన స్నేహితులారా, రాబోయే కాలంలో జరగబోయేదాన్ని గురించి ఆలోచిస్తే అంతా అగమ్యగోచరం.
క్రొత్త సంవత్సరం మన ఎదుట ఉంది. దాన్ని స్వాధీనపర్చుకునేందుకు మనం బయలుదేరుతున్నాం.
👉 మనకేం ఎదురవనున్నదో ఎవరు చెప్పగలరు?
👉మనకి కలుగబోయే క్రొత్త అనుభవాలు, జరుగనున్న మార్పులు, క్రొత్తగా తలెత్తనున్న అవసరాలు ఎవరూహించగలరు?
కాని మన పరలోకపు తండ్రి ఇక్కడ మనకొక ఉత్సాహభరితమైన ఆనంద సందేశాన్ని అందిస్తున్నాడు.
“అది నీ దేవుడైన యెహోవా లక్ష్యపెట్టు దేశము. నీ దేవుడైన యెహోవా కన్నులు సంవత్సరాది మొదలుకొని సంవత్సరాంతము వరకు ఎల్లప్పుడు దానిమీద ఉండును”.
👉 మన అవసరాలన్నీ దేవుడే తీరుస్తాడట. ఎప్పటికీ ఎండిపోని నీటి బుగ్గలు అయనలో ఉన్నాయి. ఆనకట్టలు లేని సెలయేళ్ళు, జలధారలు అయన దగ్గర నుండి ప్రవహిస్తూ ఉన్నాయి.
👉 ఇక ముందు ఏమి జరుగుతుందో అని ఆందోళన చెందుతున్నారా?
ఇదిగో దేవుని కృప నిండిన వాగ్దానం, ఆశీర్వాదాలు ఆయన నుండి ప్రవహిస్తూ ఉన్నాయి. ఆ ప్రవాహానికి అంతం లేదు. ఈ ప్రవాహం ఎండకి, అనావృష్టికి ఎండిపోదు. ఈ ప్రవాహం దేవుని పట్టణాన్ని సస్యశ్యామలం చేస్తుంది.
మనం అడుగుపెట్టబోతున్న దేశం కొండలు, లోయలు ఉన్న దేశం. అంతా చదునుగానూ ఉండదు.
అంతా పల్లంగానూ ఉండదు. జీవితం చదునుగా, ఎత్తు పల్లాలు లేకుండా ఉంటే అది నిస్సారం అవుతుంది. కొండలు ఉండాలి, లోయలు ఉండాలి.
👉 కొండలు వర్షధారల్ని పోగుచేసి లోయల్లోకి ప్రవహింపజేస్తాయి. మన జీవితాల్లోనూ ఇంతే.
కొండలు ఎదురైనప్పుడే మనం కృపాసింహాసనం ఎదుట మోకాళ్ళూని ఆశీర్వాద వర్షధారల్ని పొందుతాము.
కష్టాల పర్వతాలను చూసి దిగులు పడతాము, సణుగుకుంటాము. కాని ఈ పర్వతాలే మనపై వర్షాలు కురవడానికి కారణం.
దృడమైన, తలవంచని, అజేయమైన కొండ ప్రదేశాల్లో, శత్రువుల నుండి రక్షణ కలిగించే కొండచరియల్లో ఉండేవారు క్షేమంగా ఉన్నారు. జీవితంలో మనకెదురయ్యే కష్టాలు దేవుడు మన యెదుట నిలువబెట్టే కొండల్లాంటివి. వీటి వల్లనే మన జీవితాలు సంపూర్ణం అయి దేవునికి దగ్గరగా మనం వెళ్ళగలుగుతున్నాము.
మనకి ఎలాంటి భాధలు, వేదన, శ్రమలు ఎదురవుతాయో తెలియదు. ‘కేవలం నమ్మకం ఉంచు’.ఈ హెచ్చరికను అనుసరించి అలా చేస్తే ఈ రోజు దేవుడు మన దగ్గరకి వచ్చి మన చెయ్యి పట్టుకొని ముందుకు నడిపిస్తాడు. ఇది మంచి సంవత్సరం. దీవెనకరమైన క్రొత్త సంవత్సరం.
అగమ్యగోచరమైన దారులగుండా ఆయన నిన్ను నడిపిస్తాడు అడుగులు తడబడినా అలసట పైబడినా పైపైకి పైపైకి అంధకారం దారి మూసినా గాలివానలు గోలచేసినా మబ్బులు విడిపోతాయి ముందుకు నడిపిస్తాడు
కాల కల్లోలాల ఊహాలోకాల్లో అనుమానాల్లో భయాల్లో అల్లిబిల్లిగా అల్లుకున్న ముళ్లకంచెల్లో చేయి పట్టి నడిపిస్తాడు మబ్బు కమ్మిన వేళల్లో కష్టం నష్టంలో తన చిత్తం నెరవేరుస్తాడు తానే ముందుకు నడిపిస్తాడు